سحرایلن بیگانه ائتدین آشنالردن منی - فضولی

سحرایلن بیگانه ائتدین آشنالردن منی - فضولی

فارغ ائتدی مهرین اؤزگه مه لقالردن منی،
حرز ایمیش عشقین سنین، ساخلار بلالردن منی.

کؤنلوم آلدین، گؤستریب یوز لطف و منت جانیما،
ائیله دین مستغنی اؤزگه دلربالردن منی.

وامق و فرهاد تک رسوایه قیلمین نسبتیم،
بیر فقیرم، سانمانیز اول خود نمالردن منی.

عشوه و نازایله دفع ائتدین غم و اندوهیمی،
سحرایلن بیگانه ائتدین آشنالردن منی.

قیل تکلم، زلفون اندوهینی، کؤنلومدن گئدیر،
بیر فسون ایله خلاص ائت، اژدهالردن منی.

غایت زهد و ورع، زاهد، وصال حور ایسه،
وجهی یوخ منع ائتمگین حوری لقالردن منی.

هر جفا قیلسن، فضولی تک شکایت قیلمازام،
عشق اطواریندا سانما بیوفالردن منی.