شعر ترکی زبان حال حضرت زهرا سلام الله علیه-رحیم منزوی اردبیلی
بالینیمه گل پیک اجل گلدی عم اوغلی
باغلا گوزونی فاطمه دینجلدی عم اوغلی
ماموریدی پیک اجل الان باشیم اوسته
بیر سنده گل ای سویگلی جانان باشیم اوسته
ای ناطق قرآن اوخی قرآن باشیم اوسته
قرآن سسیووه سن بیلوسن چوخ هوسیم وار
خوش لحنیله قرآنون اوخی تا نفسیم وار
ای مونس غم آز منی غرق محن ایله
مندن صورا ترک گل و باغ و چمن ایله
وئر غسل اوز الونله من زاره کفن ایله
آگاه ایلمه ثانی شدادی عم اوغلی
گلسه بیلوسن روحیمه ایذادی عم اوغلی
غسلومدا گوزون اشکینی خون دیله قاتما
گورسون اثر ظلم و ستم نالون اوجاتما
اگنیمده اولان کوینگی سعی ایله چیخاتما
بیر نحویله تا غسلومی ویر کوینگیم اوستن
کشف ایلمه بیر کیمسیه قمچی اثرین سن
جان ویرمگیمی گرچه چوخ آسان سانورام من
یادیمه دوشور محسن اورکدن یانورام من
ثانی لگدین محسینه قاتل سانورام من
چون من کیمی مظلومه گورنمز گوز ایوینده
ناموس حقی کیم ویرار آیا ئوز ایوینده
بیر اللی قیام ایتدیم اولان وقته مصلی
گتدیم عمله ذکر قنوتیمی بیر اللی
گیزلینجه نماز ایلمیشم اولمیا بللی
گیزلینجه نماز ایتمگیمین علتی واردی
چون قنفذ ایدن ظلمیلرین شدتی واردی
هجران اوخونا حکم مشیتله نشانم
لبیک دیوب محفل جانانه روانم
ام حسنیمدن چوخ حسیندن نگرانم
بلبل تک اونی بسلمیشم چونکه گل اوسته
قورخوم بودی خولی قویا مطبخده کل اوسته
بیر گون گزورم چوللری آواره دولاننام
مقتلده قیزیم زینبیلن منده دایانام
گودالیده زینب بویانان قانه بویاننام
یانام غم اطفال پریشان حسینه
گوز یاش توکرم خیمه سوزان حسینه
گللم من ئوزوم شام غریبان حسینه
لازمدی اولاخ کوفه ده مهمان ایکیمیزده
واجبدی دوتاخ شام غریبان ایکیمیزده
ای باشسیز عیال وحرمین باشدان آتان باش
می صورتینین نسبتی اللهه چاتان باش
سنسن دی گوروم سینمین اوستونده یاتان باش
یا گوزلرون آچ قانلی گوزونن تانییم من
یا منله دانش تا کی سوزونن تانییم من
ایندی واریدیم کرب و بلاده من خسته
یاندیردی یانان قلبیمی بیر قلبی شکسته
گوردوم یاتیب ایستکلی رقیون سینن اوسته
هر دم دیور ای شاه لب عطشان منی دیندیر
تیر غم ایدیب سینمی شان شان منی دیندیر
ایتدوقجه اوغول حنجر منحوریووه دقت
یوز ویردی اوغولسوز آنووا حالت رقت
گوردوم که دگوب حنجریووا اون ایکی ضربت
بیلدیم بالا چوخ اینجموسن گل سینم اوسته
جان تک باسوم اغوشیمه دینجل سینم اوسته
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
