شعر ترکی شجاعت حضرت علی اکبر (ع)-رحیم منزوی اردبیلی
ماه ملک منظره باخ ، صورت پیغمبره باخ
قدرت صورتگره باخ ، اکبره باخ اکبره باخ
گویده فقط ماه بودور یرده فقط شاه بودور
حقّه دیسون راه بودور سیر الی الله بودور
سرّ فدیناه بودور بندة درگاه بودور
مست عَلَی الله بودورساق یدالله بودور
اللّره باخ اللّره باخ اکبره باخ اکبره باخ
کنز ادب گوهریدی گوهره ده جوهریدی
اَشبه پیغمبریدی چون اونا چوخ بنزریدی
یوسفه تاج سریدی عالم اونا نوکریدی
لیلیه بال و پریدی عمّه سینه چاکریدی
زینبه باخ چاکره باخ اکبره باخ اکبره باخ
چون دیدی موسی اَرنی لن دیدی خلّاق جهان
تا اونا اَرنی دیمیه بیرگونی هر گلّه چران
هر نئی آئینه گورر اَرنیه یوخ جای بیان
آینه گر گورمسه ده گورسدر اشیانی عیان
آینة داوره باخ اکبره باخ اکبره باخ
جدّینون عمامه سینی باشه قویوب چون مه اولوب
سورة نور اوسته گوزل حلقة بسم الله اولوب
جدّی کمین قامتینه رشگ آپاران کوته اولوب
ابن ذبیحینیدی بو ایندی ذبیح الله اولوب
لیلیه باخ هاجره باخ اکبره باخ اکبره باخ
سرو دوتوب پا دولانور ماهی دی صحرا دولانور
مهر دل آرا دولانور یوسف رعنا دولانور
باشن لیلا دولانور لیلیه دنیا دولانور
جنّتی حورا دولانور چوللری زهرا دولانور
مادره باخ مادره باخ اکبره باخ اکبره باخ
زیندَه بیر کوه اوتوروب تلّی وقاریله اَنور
جام شهادت عطشی چشم خماریله انور
رَفرفه فخر ایلورآتی بیله سواریله انور
نعلی هِلال عکسی سالور ماه عذاریله انور
اسب نکو منظره باخ اکبره باخ اکبره باخ
گاه گیدورگه کج ایدورگردنی پشت سرینه
گوشة چشمیله باخور ماه ملک منظرینه
باخماسا گیتمز یولنی عاشق اولوب گوزلرینه
آل علی آتلاریدا لایق اولور ئوزلرینه
هیکله باخ پیکره باخ اکبره باخ اکبره باخ
صفلره باخدوقجا اونا حمله ایده عار گلور
گوزلرینه یوزمین عدو مور گلور مار گلور
ماه زره پوشیدی یا سرو کُلهدار گلور
تیغنی اویناتدوقجا لرزیه کُفّار گلور
لرزه ایدن لشگره باخ اکبره باخ اکبره باخ
سس دوشوب اعدایه قاچون حیدرکرّار گلور
تک گوروب اوغلین کمگه احمدمختار گلور
یاخشی باخون حمزه دی یا جعفر طیّار گلور
گر بونا بیر یاره دگه داده علمدار گلور
تلّده سر لشگره باخ اکبره باخ اکبره باخ
مکریله شیطاندنی بکره گیندیردی زره
حلقة قلّابه لره وردی طنابیله گره
بلمدی شیرون ایاقی آتدا اولار مورچه له
یا که مهارتله چکر تیغی مهندس کیمی زِه
عقل دیر کیفره باخ اکبره باخ اکبره باخ
بَکرون آتین طبل و دُهُل ایتدی روان رزمه دو تک
عَربَده دن مکر و حیّل اولدی فراموش فلک
بکریله شیطان دانیشورجلد اول او شمشیروی چک
سسلدی تلّ اوسته حسین اکبره الله مَعَک
دشمنه باخ یاوره باخ اکبره باخ اکبره باخ
آتلارین اویناتدی ایکی فارس شجعان عرب
اولدی خروشان نجه که قطریه دریای غضب
ایتدی تماشاچیلری برق جهان غرق عجب
قالدی جهاندیده قویپنجه لر انگشت بلب
سسلدیلرصرصره باخ اکبره باخ اکبره باخ
اکبر ایله دور ، ورور بکر ایله بیل ثابتیدی
چرخش اکبردن اونی مات آپاروب ساکتیدی
تتره دی بکرون سپری بلدی که شمشیر ایتیدی
شیر چکور نعره ولی حیف حریفی ایتیدی
خصم زسگ کمتره باخ اکبره باخ اکبره باخ
نیزه گیدور خنجر انور تیغلر اوینور یاناشی
حملة اکبردن اولوب جنگ لر استادی ناشی
بیر سپرآیا نه قدر گیزلَدَه جک خیره باشی
بو باشی تندن آیرا اکبره تنها یاراشی
حملة رزم آوره باخ اکبره باخ اکبره باخ
عاجز اولوب معرکه ده دشمن مغرور علی
دشمنه یول تاپدی او دم نور علی نور علی
قلبی پُر از نور علی پور علی زور علی
شاه رگیندن اونا بیر تیغ وروب پور علی
تیغ قوی جوهره باخ اکبره باخ اکبره باخ
باش توز ایچیندن اوجالوب گویده گلوبدور نظره
قویمادی اکبر او باشی دوشسون او مأواده یره
دوتدی هواده گتیروب هدیه اونی خیمه لره
مقدم سلطانه آتوب بلکه بیر انعام ویره
یعنی بابا لبلره باخ اکبره باخ اکبره باخ
باخدی سوسوزلبلرینه اوزدن آخان قان ترینه
گون قباقیندان چاغروب سایه نون آلتدا سرینه
ویردی قلاق سوزلرینه ایتدی نظر گوزلرینه
اکبری سیراب ایلسون حکم ایدوب انگشترینه
معجز انگشتره باخ اکبره باخ اکبره باخ
قویدی که انگشترینی غنچه دهان ایچره امام
آتش نمرود عطش ایتمشیدی سلب دوام
آتشه امر اولدی او دم کونی بَرداً و سلام
یعنی خدا جنگ ایلیوب تشنه دییورقوندی بالام
گلدی ندا کوثره باخ اکبره باخ اکبره باخ
اوغلوی سیراب ایدرم عالمی یاندیرماحسین
اشگوی یعقوب کیمی قانه بویاندیرما حسین
بیرجور ایله تشنه لیگین لیلیه آندرما حسین
جدّی اونا سو گتوروب سنده یوباندرماحسین
الده دولی ساغره باخ اکبره باخ اکبره باخ
تشنه فداسین سواروب ایتدی گنه رزمه روان
اولدی مبارز طلب و مرکبه ویردی جَوَلان
ایلدی سعد اوغلی او دم طارق بن شیشه بیان
سن دوراسان عرض وجود ایلیه بو تازه جوان
اوندا اولان دللره باخ اکبره باخ اکبره باخ
طارق اوناویردی جواب ای عمر شوم و دنی
مکریله ابلیس کیمی ایلمه تحریک منی
سالما بو غوغایه منی من تانورام یاخشی سنی
بی جهت آیا من اولوم خصم رسول مدنی
کیفره باخ محشره باخ اکبره باخ اکبره باخ
طارقه سعداوغلی دیدی گلمورم اصلا دله من
هرنه جسارت ایده سن ایتمرم الان گله من
چون بو جوانون باشنا موصلی ویرّم صله من
حکموی بوردان یازارام ناحیة موصله من
حاکم اولوب دفتره باخ اکبره باخ اکبره باخ
ایلدی سعد اوغلی اودم خارج ئوز انگشترینی
سالدی گرو بارماقناچون تانیدی مشترینی
گتدیله گرز و تبر و نیزه سینی نشترینی
چاتدی یدک مرکبینه خنجرینی شش پرینی
وعدة سیم و زره باخ اکبره باخ اکبره باخ
طارق روئین تن اولوب دشمن پر روی گلور
هی وریلور زنگ یریش های گلور هوی گلور
موجیلی دریایه طرف سیزقین آخان جوی گلور
شیر قولین باغلاماقا بیر نچه تل موی گلور
کبکبة لشگره باخ اکبره باخ اکبره باخ
تلّدن عبّاس دیور قورخما آماندور گوزلیم
سسلنور اکبر عمو جان تیغه مسلّطدی الیم
تیغی چکوب سسلدی ای حربة تیز جدلیم
برق ئوزی شمشیره دیدی صبر ایله قوی منده گلیم
خیره لنن گوزلره باخ اکبره باخ اکبره باخ
موصلی بی میم ایلدی وصل اونی نیرانه چکه
وصله چکوبدور بیرال فواصل ایدوبدور دَرَکه
قاندان اَوَل تیغ چخوب دوشمدی شمشیره لکه
قالمادی اوغلانلاریدا مالک اولا ما ترکه
عاقبت بدتره باخ اکبره باخ اکبره باخ
گلدی بیر اوغلی چاپاراق نیزه النده آلاقان
بیر اگلوب قالخدی علی نیزه نی دوتدی آرادان
نیزه دن ال چکدی طرف ایستدی چخسون آرادان
نیزه کورکدن دگه گر گور چخار آیا هارادان
پس پسر دیگره باخ اکبره باخ اکبره باخ
گر چه آتا قارداشنون ئولمگی عبرتدی اونا
گلمسه قان آلماقادا گوردی که ذلّتدی اونا
غیرتی بعضی عربون عین خریّتدی اونا
بلدی همان ضربه لرون سوّمی قسمتدی اونا
خصم خطا پروره باخ اکبره باخ اکبره باخ
تلّده عبّاس وحسین دورمش او رعنایه گوره
یار بُلور قدرتنی خوشدی که اغیار گوره
ایستدی استادینه ئوز درسینی تحویل ویره
چکمدی اوچ دیقه یخوب بیر سگ ایکی توله یره
یان یانا اوچ کافره باخ اکبره باخ اکبره باخ
اکبره سعد اوغلی گوروب بیرکیشی یوخدور باتیشا
گر آتین اویناتساچتین گردینه گردون چاتیشا
آز قالی لشگر بیچیله هرزه علف تک یانیشا
ایستدی بیرتک نفره بیردن اوتوزمین قاتیشا
فتنیه بیر باخ شره باخ اکبره باخ اکبره باخ
دلده دعا بهت آپاروب خیمه ده لیلا ننه سین
آلدی او اثناده خانم بیر یواش آمین سسین
فکر ایلدی فاطمه دیکسدی یانقلی نفسین
گورمدی زهرانی ولی گوردیسه ساله نوه سین
عاشقه باخ دلبره باخ اکبره باخ اکبره باخ
حملة اوّلده شکاف اولدی صفوفون آراسی
یاره چاتوب قانه باتوب وار هله تک تک یاراسی
گرمیدی جنگ و جدله سیّدبطحا بالاسی
ساچلار النده باجسی معجر النده آناسی
مادره باخ خواهره باخ اکبره باخ اکبره باخ
بیرایله جنگ ایتدی اوگون شبه رسول مدنی
دوزخه ایلوردی روان جمله قاباقدان گلنی
اولدی گنه کوفه لیه صولت حیدر علنی
هر کیمه شمشیر ورور مرحبه بنزر بدنی
مَرحَبه باخ حیدره باخ اکبره باخ اکبره باخ
نعرة تکبیری آییق دللری ارشاد ایلیور
ضربة شمشیری دل دشمنی ناشادایلیور
مومنة امداد ایلیور کافره بیدا ایلیور
راکبی تپراقه سالور مرکبی آزاد ایلیور
شیر غضنفر فره باخ اکبره باخ اکبره باخ
سسلورعمر سعد هاچان بخر کمین بس داشاریق
قیرسا بیر آزدا قشونی نصفدن الآن آشاریق
بیر بیله درنده لرین یوخدی بیرینده باشاریق
بیر نفر ئولدورسه اونی بیزده سلامت یاشاریق
پنجة مرگ آوره باخ اکبره باخ اکبره باخ
چون اَب و جداً تانورام بوعَلَوی زاده نی من
حیدره بنزرگورورم صولت شهزاده نی من
سندیریم آیا نجه بو زور خدا داده نی من
مکر کمندیله یخام بلکه بو آزاده نی من
شیطنت شر خره باخ اکبره باخ اکبره باخ
بوزرهی که بو گیوب بندینی مشکل قرالار
دورسامقابل بونی مین آتلی چتین سندرالار
من بله فکر ایلمشم دام سیاست قورالار
تا که علی تک علوی زادهنی دالدان ورالار
نقش خیانتگره باخ اکبره باخ اکبره باخ
آند ایچوب اوّل او شقی منقذ بی شرم و حیا
بوینوماگلسون عربون ایلدیگی جرم و خطا
ورماسام ایندی دالیدان من بونا بیرکاری یارا
سسلنر الآن آتاسی وا ولدا وا ولدا
خیمه ده وا اکبره باخ اکبره باخ اکبره باخ
گزدی کمیننده بیر آز چونکه او زیبا پسرین
فرصتی سالدی النه ایتدی کمین پشت سرین
غفلتی بیر ضربتیلن یاردی پیمبر جگرین
ایلدی شق القمرین بوکدی حسینون کمرین
بیرباشا باخ خنجره باخ اکبره باخ اکبره باخ
بسکه قلج نیزه دگوب یوسف سیمین بدنه
ال تاپا یعقوب چتین قانه باتان پیرهنه
گوزلری قانیله دولوب آگه اولانمور گلنه
چاک اولونوب پیرهنی سینه هدفدور گورنه
سینه دیمه مرمره باخ اکبره باخ اکبره باخ
گلمدی ادرک دلنه دوشمیه تا رنجه امام
سرور اسلامه ایدوب رسم وداعیله سلام
گوردیکه بیر سس گلوری گوزلرون آچ نازلی بالام
سن دوشه سن بو حالا من خیمه ده آسوده قالام
منده دل مضطره باخ اکبره باخ اکبره باخ
ایتدی ابوالفضله نظر ایشلره ترتیب ویره
فوراً عباسین دوشه دی جانب اکبرده یره
پرپراولان بیر گل اگر هامّی گرک ال یتوره
هر بیریمین وای دیدی بیرعضوینی یردن گوتوره
یعنی گل احمره باخ اکبره باخ اکبره باخ
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
