شعر ترکی حضرت ابوالفضل(ع)-رحیم منزوی اردبیلی
یوخ سوزوم منده علینون اوغلیام اما حسین
کامل اولماز هر اوغول صود وئرمسه زهرا حسین
چونکه زهرا کیمیادی مرتضی شاه ولا
علتی وار من مس اولدوم سن حسین خالص طلا
سن منه امر ایلدون جنگ ائتمه بیر آز سو گتور
تشنه قیزلارون سوسوزلیق دردینه درمان یتور
ایلدیم ئوز سعیمی آخر سویی گتدیم اله
قلب نخلستاندا دوشدوم بئله بیر مشگله
نه الیم اولدی ائدم مشگی الیمده پشت و رو
لااقل بو اوخ یریندن آخمویا بیهوده سو
اولمادی حلال مشکل مشکلیم حل ایلیه
نصفی قالسیدی سویون السیز گلردیم خیمیه
من رقیه خاطریندن گئچمرم هیچ خاطره
اولسا خدمتده قصوریم سنده گل کئچ خاطره
دشمن مکرین بله بیلسیدیم اوّلدن حسین
هر نه دن اوّل چیخارداردیم سویی الدن حسین
مشکی باغلاردیم جلو بندیله زینون قاشینه
من دوشوب بوشلاردیم اوردان مرکبی اوز باشینه
سو یتیشسیدی گورردیم راحت اوز وجدانیمی
ناگران جنگ ایلمزدیم قورتاراردیم جانیمیی
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
