بو گون یئددین اولدو - بختیار وهاب زاده
آنام اؤلدومو؟
نه تئز اللرینی اوزدون دونیادان،
بالانی تک قویوب هارا گئتدین سن؟
نئجه یوخ اولورموش بیر آندا اینسان،
ائله بیل دونیادا هئچ یوخ ایمیشسن.
گونش غوروب ائتدی... اوتاق قارالدی،
بیر آندا یوخ اولدون سن خیال کیمی.
ایندی دوشونورم: سندن نه قالدی،
کؤنلومده خاطیره ن قارا خال کیمی.
منی بویا-باشا یئتیردین، آنا
بیزه بورجلو بیلدیک هر زامان سنی.
سن منی دونیایا گتیردین، آنا،
منسه یولا سالدیم دونیادان سنی.
سن منه بئشیکده لای لای چالمیسان
بو گون لای لای چالیم سنه من ده می؟
سنین شیرین-شیرین لایلالارینی
من سنه قایتاریم جنازه نده می؟
"یوخون شیرین اولسون" - دئیردین منه،
"یوخون شیرین اولسون" - دئییم می سنه؟
گرک من باشینا دؤنم-دولانام،
منی حیات اوچون
یاتیران آنام،
سؤیله اؤلومچون
نئجه یاتیریم
سنی من بو گون؟
بو نئجه دونیادیر، آنلامیرام من،
جیلوه سی جوربه جور، رنگی جوربه جور.
دونن نفسی یله سنی ایسیدن
بو گون بوزا دؤنوب، داشا دؤنوبدور.
بو نئجه دونیادیر،
اینسان اوغلونون
خیالی گؤیده دیر، اؤزو یئرده دیر،
ساغ ایکن چینینده حیاتین یوکو
اؤلنده جسدی چیینلرده دیر...
بو نئجه دونیادیر، بو نئجه دونیا،
اؤلومو حقیقت، حیاتی رؤیا.
دردیمین، غمیمین سندین اورتاغی،
نیه اوز دؤندردین، بس نیه مندن؟
"دردین منه گلسین!" - دئیردین آخی،
نیه درد جالادین دردیمه بس سن؟...
آنام، هئچ کس سنی اینجیتمه میشدیر،
من سنی،
من سنی اینجیدن قدر.
ایندی کیمه آچیم دردیمی بیر-بیر،
کیم منیم دردیمه یانار سن قدر؟
ائوین هر کونجونده گؤرونور یئرین.
گؤزوم آختارجیدیر، آنا، آی آنا.
"ننم هانی؟" - دئییر کؤرپه آذرین.
من نه جاواب وئریم اونا، آی آنا؟
بیلمیرم، بیلمیرم بو اؤلوم ندیر.
حیات وار ایکن؟
نفسین، آی آنام، هله ائوده دیر،
اؤزون یئر آلتیندا داشا دؤنموسن.
بو گون یئددین اولدو...
آنام، یئددی گون،
بیزیمله برابر آغلار اوتاقلار.
سنه،
یالنیز سنه،
سنه دئمکچون
کؤنلومده نه قدر منیم سؤزوم وار.
"کیملری چاغیراق بو گون یئددی یه؟
" خالالار، باجیلار سوروشور مندن.
آنامدان سوروشاق، او بیلر دئیه،
سنین اوتاغینا اوز توتورام من.
آنام، تاپشیریلدین آنا تورپاغا،
بو اؤلوم، سینه مه چکدی داغ منیم.
سن منیم آرخامدا بنزردین داغا،
ائله بیل آرخامدان اوچدو داغ منیم.
قؽزیمین آدیدیر سنین اؤز آدین.
بو دا گؤز داغیدیر منه بو گون ده.
سون دفعه سن منه باخیب آغلادین.
صورتیم مزارا گئتدی گؤزونده...
عؤمرو باشا ووردون آلتمیش یاشیندا.
آلتمیشین اوستونده دوروب یاشین دا.
آرتیق سنین اوچون دایانان زامان
منیمچون دولانیر...
گون اولور آخشام.
واخت کئچیر، سن مندن اوزاقلاشیرسان،
من سنه گون به گون یاخینلاشیرام.
