فرازی از شعر یا مولا استاد کلامی زنجانی
علی ای نابغه لر نابغه سی
گوزل آیندسی هم سابقه سی
علی ای قافله لرسالاری
شیعه نین هادی وپرچمداری
علی ای فرق بنی آدمه تاج
سفرۀ جودیوه عالم محتاج
علی ای مروه صفا مقصودی
کعبه نین اوغلی حرم مولودی
علی ای خضردن أؤلا بنده
هامی جوینده دی سن یابنده
جاودانسان دیری سن باقی سن
فاطمه کوثر و سن ساقی سن
گر ملک سن نیه بس خاکیده سن؟
سنی احمد گوروب افلاکیده سن
یرده سنسیز اَله گلمزبرکت
گویده سنسیز ملک ایتمز حرکت
شُهره هنگامه دی رُجحان محشر
ها علیّ بشرُ کیف بشر
مرحبا لر سنه طاها بویوروب
هر نه طاها دیسه باجا بویوروب
**************
گورمسیدیم آنادان اولماقیوی
دسته گل تک بلنن قونداقیوی
شبهه نی قلبمه حکّ ایلردیم
لم یَلد یولَده شکّ ایلردیم
سن ولی عبدِ حق رحمانسان
اشتباه ایلمورم، انسانسان
ای یاتان بسترپیغمبرده
وی سَلونی بویوران منبرده
گجه قؤزانسا مناجات سسی
ربّنا نغمه سی آیات سسی
بو علی دور دیرم پنهانی
دولانور کوفه ده نخلستانی
دلده که سوزلریوه حیف اولسون
قان دولان گوزلریوه حیف اولسون
آندویرّم گوزل اوغلون حسنه
هم حسین جانینه که جاندی سنه
آقالیق شمعینی خاموش ایلمه
بیزی محشرده فراموش ایلمه
مأخد : ناله های کلامی
سال انتشار : ۱۳۷۴
مطالب مرتبط
